ایپل
ایپل | |
![]() | |
ٹائپ | کمپنی |
بنی | 1 اپریل 1976 |
نیو رکھن والا | سٹیو جابز،سٹیو وازنیاک |
ہیڈکواٹر | کپرٹینو کیلیفورنیا |
کاروباری تھاں | ساری دنیا |
ایپل امریکہ دی اک کمپنی اے جیڑی الیکٹرانکس، کمپیوٹر سافٹویئر تے پرسنل کمپیوٹر بنا کے ویچدی اے۔ ایپل سارے جگ چ میکنٹوش، آئی پوڈ، آئی فون تے آئی پیڈ بنان والی کمپنی لئی جانی جاندی اے۔ اے جگ دی سب توں وڈی ٹیکنالوجی دی کمپنی اے تے شیئر مارکیٹ آلیاں کمپنیاں چ جگ دی سب توں وڈی کمپنی اے۔ ایپل دی 10 دیساں چ 357 دکاناں نیں تے اک انٹرنیٹ تے دکان اے۔
تریخ[سودھو]
ایپل کمپنی دی نیو 1 اپریل، 1976 وچ کپرٹینو، کیلیفورنیا، امریکہ چ سٹیو جابز، سٹیو وازنیاک تے رونالڈ وین نے رکھی۔ ایپل کمپنی نے اپنا پہلا کمپیوٹر ایپل I مارکیٹ وچ وکن لئی 11 اپریل 1976 نوں رکھیا۔ اینوں سٹیو وازنیاک نے اپنے ہتھ نال بنایا سی۔ ایپل 3 جنوری 1977 نوں رجسٹرڈ کمپنی بن گئی۔ سٹیوو وازنیاک نے اپنا حصہ 800 ڈالر سٹیوو تے رونالڈ نوں ویچ دتا۔ ایپل نوں جدوں رجسٹر کروایا گیا تے اس کمپنی نوں 250،000 ڈالر اک کروڑ پتی مائک مارکلا نے دتے۔ ایدے نال نال مائک نے اس کمپنی نوں تھوڑا بوتا ٹوریا۔
ایپل کمپنی نے 1977 چ ایپل 2 کمپیوٹر بنایا جیڑا کہ اک سافٹویئر پروگرام دی وجہ توں کافی بوتا وکیا۔ 1980 چ ایپل نے ایپل 3 کمپیوٹر بنایا جیڑا کاٹے چ پے گیا۔ اس توں بعد ایپل نے ایپل لیزا کمپیوٹر بنایا جیڑا کے پہلا کمپیوٹر سی جیڑا کہ گرافیکس دے نال سمجیا تے ٹوریا جاندا سی۔ مگر اے مینگے ہون دی وجہ توں تے کٹ سافٹویئر ہون دی وجہ توں فلاپ ہو گیا۔ 1984 چ ایپل نے پہلا میکنٹوش کمپیوٹر بنایا جیدی مشہوری واسطے 1.5 ملین ڈالر مل دا ٹی وی دا اشتہار بنایا گيا۔ اے شروع چ چنگا وکیا مگر بعد چ کٹ وکنا شروع ہو گیا۔ اس دی وجہ وی ایدا بوتا مل سی تے کٹ سافٹویئر۔ 1985 چ سٹیوو جابز ایپل چھڈ گیا تے اونے نیکسٹ NeXT Inc. کمپنی بنالئی۔
ایپل نے اس توں بعد دو نکے کمپیوٹر بناۓ 1989 چ میکنٹوش پورٹیبل تے 1991 چ پاووربک۔ پاووربک بوت ٹریا جیدے توں ایپل نے بوت ترقی کیتی۔ مگر اس توں بعد ایپل نے کئی نویاں شیواں بنان دی کوشش کیتی پر اوہ ٹر نئیں سکیاں۔ اس دوران مائیکروسافٹ سافٹویئر دے بزار چ بوت اگے ود ریا سی۔ مائیکروسافٹ سافٹویئر سستہ تے عام بناندی سی جدوں کہ ایپل مینگا تے بوت زيادہ چنگی کوالٹی دا بناندی سی۔ ایپل نے موٹورولا تے آئی بی ایم دے نال رل کے نواں کمپیوٹر سسٹم بنانا شروع کر دتا۔ ایپل نے پہلا میکنٹوش جیڑا آئی بی ایم دے پاوور پی سی PowerPC پراسسیسر نوں ورتدا اے بنایا جیدے بعد ایپل پاوور پی سی پراسیسر ورتنا ٹر پیا۔
ایپل نے اکو ڈبے چ پورا کمپیوٹر 1998 چ بنایا جینوں آئی میک iMac آخدے نیں بنایا۔ آئی میک دا نویں قسم دا ڈیزائن سی تے اینوں بنان دی ٹیم دا آگو جوناتھن ایوو سی۔ جوناتھن ایوو نے بعد چ آئی پوڈ تے آئی فون دا ڈیزان وی بنایا۔ آئی میک بوت ودیا کمپیوٹر سی تے پہلے 5 مہینیاں چ اودے 800،000 یونٹ وکے۔ ایپل نے اس دے بعد دے عرصے چ کئی سافٹویئر پروگرام خریدے۔ 24 مارچ 2001 چ ایپل نے میک او ایس ایکس Mac OS Xآپریٹنگ سسٹم بنایا جیڑا یونکس تے نیکسٹ دے آپریٹنگ سسٹم نوں رلا کے اک چنگا سسٹم بنندا اے۔
2001 چ ایپل نے آئی پوڈ ویچنا شروع کیتا جیڑا کے انتہائی زیادہ کامیاب ریا۔ 6 وریاں چ 10 کروڑ آئی پوڈ وکے۔ 2003 چ ایپل دا انٹرنیٹ دے اتے آئی ٹیونز دکان ٹری جیڑی 0.99 ڈالر دے گانے ویچدی سی تے ائی پوڈ دے نال کم کردی سی۔ آئی ٹیونز وی بوت ٹریا۔ 2001 دے بعد ایپل دی ڈیزائن ٹیم نے رنگین پلاسٹک دے نال کمپیوٹر بنانے چھڈے دتے۔ اوناں نے ٹائیٹینیم دا بنیا ہویا لیپٹاپ: پاووربک جی 4، سفید پلاسٹک دی آئی بک تے ڈیسکٹاپ آئی میک بناۓ۔
6 جون 2005 چ سٹیوو جابز نے دسیا کے ایپل 2006 توں انٹل دے پراسیسر آلے میکنٹوش بنانا شروع کر دے گی۔ اوناں میکنٹوشاں تے میک او ایس دے نال نال ورتن آلے مائیکروسافٹ دی ونڈوز ایکس پی یا ونڈوز وزٹا وی انسٹال کر سکن گے۔
9 جنوری 2007 نوں سٹیوو جابز نے آئی فون تے ایپل ٹی وی دا دسیا۔ آئی فون نویں قسم دا فون سی تے بوت وکیا۔ اگلے ورے ایپل نے آئی فون واسطے ایپ سٹور کھولیا جیدے تے آئی فون دے سافٹویئر وکدے سن۔ اس دے تین مہینے بعد ایپل جگ چ تیجی سب توں بوتے موبائل فون ویچن آلی کمپنی بن گئی۔ 2010 چ ایپل نے ٹیبلٹ کمپیوٹر آئی پیڈ ٹوریا جیڑا کے بوت زیادہ وکیا۔ 2010 دی مئی چ 1989 دے بعد پہلی وار ایپل کمپنی دا شیئر مائیکروسافٹ توں زیادہ مل دا ہوگیا۔
2011 دی جون چ ایپل نے آئی کلاؤڈ ٹوریا جیڑا انٹرنیٹ دے اتے شیواں رکھن دی سروس اے۔ ایدے اتے جیڑیاں شیواں آئی فون یا آئی پیڈ اتے ہون اوہ انٹرنیٹ اتے رکھیاں جاندیاں نیں۔ اکتوبر 2011 چ ایپل نے آئی فون 4ایس وکھایا جیدے چ 8 میگاپکسل دا کیمرا، ڈبل پراسیسر تے آواز سن کے کم کرن تے گلاں دسن آلا سسٹم جینوں سری Siri کیندے نیں وی ہیگا اے۔